جیابوونەوەی ھاوسەران لە ھەرێمی کوردستان لە ٢٠١٧ەوە لە ھەڵکشاندایە
تەنھا لە شەش مانگی یەکەمی ئەمساڵدا پێنج ھەزار و ٨٨ حاڵەتی جیابوونەوە تۆمارکراون
جیابوونەوەی ھاوسەران لە ھەرێمی کوردستان لە ٢٠١٧ەوە لە ھەڵکشاندایە و تەنھا لە شەش مانگی یەکەمی ئەمساڵ پێنج ھەزار و ٨٨ حاڵەتی جیابوونەوە تۆمارکراون.
بەپێی ئامارێک، کە وێنەیەکی دەست “مۆر” کەوتووە، لە ساڵی ٢٠١٧دا لە پارێزگای ھەولێر ڕێژەی جیابوونەوە دوو ھەزار و ٩٨٥ حاڵەت بووە، لە سلێمانی ھەزار و ٣٦٠ حاڵەت و لە دھۆکیش ھەزار و ٣٨٤ حاڵەت بووە، کۆی گشتیش پێنج ھەزار و ٧٢٩ حاڵەتی جیابوونەوە لە دادگاکان تۆمارکراون .
ھەروەھا لە ساڵی ٢٠١٨دا ڕێژەی جیابوونەوە زیادیکردووە، بە جۆرێک لە پارێزگای ھەولێر سێ ھەزار و ٥٩٨ حاڵەت، لە سلێمانی چوار ھەزار و ٨٥ حاڵەت و لە دھۆکیش ھەزار و ٥٠٩ حاڵەت بووە، کۆی گشتیش نۆ ھەزار و ١٩٢حاڵەتی جیابوونەوە تۆمارکراون.
لە ئامارەکەدا ھاتووە، تەنھا لە شەش مانگی یەکەمی ساڵی ٢٠١٩دا ئامارەکە بەم شێوەیەیە، لە پارێزگای ھەولێر دوو ھەزار و ٥٣ حاڵەت، لە سلێمانی دوو ھەزار و ٣٤٥ حاڵەت و لە دھۆکیش ٦٩٠ حاڵەت تۆمارکراوە، کۆی گشتی دەکاتە پێنج ھەزار ٨٨ حاڵەتی جیابوونەوە .
ئەو ئامارانە تەنھا ئەو کەیسانە دەگرێتەوە کە لە دادگاکانی ھەرێمی کوردستان یەکلا بوونەتەوە.