مۆزەخانەی نیشتیمانیی ئەمنە سوورەکەی شاری سلێمانی، کە دەیان وێنە و پەیکەر و جێماوەکانی زیندانیان و خۆڕاگریی شارەکەی دژ بە سیاسەتی زۆرداریی رژێمی بەعسی لە خۆگرتووە، “بەهۆی نەدانی مووچەی کارمەندان” داخرا.
مۆزەخانەکە لە تۆڕی کۆمەڵایەتیی فەیسبووک راگەیەندراوێکی بڵاو کردووەتەوە و لە باسکردنی هۆکاری داخستنی مۆزەخانەکە ئاشکرای کردووە: ” دوای خۆڕاگرییەکی زۆری کارمەندانی مۆزەخانە، کە زیاتر لە چوار مانگە مووچە و بودجەی مۆزەخانە راگیراوە و نەتوانراوە سێرڤزی بەشەکان و هۆڵەکانی مۆزەخانە بکرێت، بەم هۆیەوە کێشەی هونەری وتەکنیکیان بۆدروست بووە”.
لە راگەیەندراوەکەدا هاتووە: “زۆرێک لە کارمەندان کرێچیی و خاوەنی منداڵن و پێویستیان بە سەرچاوەی بژێوییە کە بە ناچاری رۆژانە دەچن بۆکاری کرێکاریی تا بتوانن درێژە بە ژیانی رۆژانەیان بدەن”.
ئەمنە سوورەکە کە لەلایەن رژێمی بەعس وەکو زیندان و سەنتەری ئەشکەنجەدان لە سلێمانی بەکار دەهات، لە ساڵی 1995 کرایە مۆزەخانەیەکی نیشتیمانیی، ئێستاش بەهۆی دابینەکردنی بودجە و مووچەی شوێنەکە، بڕیاری داخستنی لە لایەن ستافەکەیەوە درا.