ل دره‌نگیا ئێڤاریا ئه‌ڤرۆ یا رۆژا پێنچشه‌مبى 17/10/2019، گرۆپه‌كێ دى یێ په‌نابه‌رێن كوردێن رۆژئاڤایێ كوردستانێ كو پێكهاتى بوون ژ 611 كه‌سان گه‌هشتنه پارێزگه‌ها دهۆكێ.
سالم سه‌عید، به‌رپرسێ راگه‌هاندنا بۆردێ كارۆبارێن مرۆڤایه‌تى ل پارێزگه‌ها دهۆكێ بۆ (باسنیوز) دیار كر، ژماره‌كا دى یا په‌نابه‌رێن رۆژئاڤایێ كوردستانێ كو ژمارا وان ژ 611 كه‌سان پێك دهات هاتنه هه‌رێما كوردستانێ ب رێ یا ده‌رگه‌هێ سێمالكا و ل پارێزگه‌ها دهۆكێ كه‌مپا به‌رده‌ره‌ش هاتنه نیشته‌جێكرن.
زێده‌تر دبێژیت: “پارێزگه‌ها دهۆكێ ب هه‌ماهه‌نگى دگه‌ل رێكخراوێن IOM و UNHCR و ده‌زگایێ خێرخوازى یێ بارزانى كارێ سه‌رپه‌رشتى و ڤه‌گۆهاستنا و بلاڤكرنا خوارنێ ل سه‌ر په‌نابه‌ران دكه‌ت هه‌ر ژ سنورێ هه‌رێما كوردستانێ و رۆژئاڤایێ كوردستانێ هه‌تا كو كه‌مپا به‌رده‌ره‌ش پێخه‌مه‌ت باشكرنا ره‌وشا وان په‌نابه‌ران یێن دهێنه پارێزگه‌ها دهۆكێ و ستافێ بۆردى دێ به‌رده‌وام بیت ل سه‌ر خزمه‌تكرنا وى خه‌لكێ لێ قه‌ومیا و ئه‌وێن كۆچكرین ژبه‌ر هێرشێن تركیا سه‌ر ده‌ڤه‌رێن كوردى ل رۆژئاڤایێ كوردستانێ”.
