بەڕێوەبەرایەتی خۆسەری دیموكراتی ڕایدەگەیەنێت، كە سەرەڕای ڕێككەوتنی ئاگربەست، بەڵام توركیا و چەكدارەكانی بەردەوامن لە پێشێلكاری و بۆردومانی ناوچەكانی ڕۆژئاوا و دەشڵێت: “300 هەزار كەس ئاوارەبوون و زیاتر لە 235 كەس شەهید بوون، كە 22 كەسیان منداڵن”.
بەڕێوەبەرایەتی خۆسەری دیموكراتی لە ڕاگەیەنراوێكدا، كە لە بارەگای ئەنجوومەنەكە لە حەسەكە لەلایەن هاوسەرۆكایەتی ئەنجوومەنی جێبەجێ كردنەوە خوێنرایەوە ئاماژەی بەوەكردووە، كە توركیا و چەكدارەكان تاوانی كۆمەڵكوژییان ئەنجامداوە لە چەندین ناوچە، كە هەموو پێوەرە ئەخلاقی و مرۆییەكانی پێشێل كردووە.
ڕاشیگەیاندووە، بەهۆی هێرشەكانی توركیا و چەكدارە تیرۆرستەكانەوە زیاتر لە 300 هەزار كەس ئاوارەبوون و زیاتر لە 253 كەسی مەدەنی شەهید بوون، كە 22 كەسیان منداڵن و 677 برینداریش هەیە، ئەمە سەرەڕای دەیان شەهید، كە كەوتوونەتە ژێر دار و پەردووی خانووەكان و دەیان برینداریش، كە لە شاری سەرێ كانی گەمارۆ دراون.
ئاماژەی بەوەشكردووە، لە 17-10-2019 ئەمریكا و توركیا لە ئەنقەرە گەیشتنە ڕێككەوتن بۆ ئاگربەست و وەستانی كاتی شەڕ بۆ ماوەی 120 كاتژمێر و ئێمەش وەك هێزەكانی هەسەدە و ئیدارەی خۆسەری پێشوازیمان لەو ڕێككەوتنە كرد بۆ پاراستنی گیانی هاووڵاتیان و دوورخستنەوەیان لە ناوچەكانی شەڕ و كارەساتی مرۆیی.
دەشڵێت: “بەڵام هێرشی توركیا بەردەوامە و ئێمەش تەنها مافی بەرگری شەرعیمان بەكارهێناوە و دوای دوو ڕۆژیش لە پابەندی هەسەدە بە ڕێككەوتنی ئاگربەست، بەڵام توركیا و چەكدارە تیرۆرستەكان هێشتا هێرشەكانیان ڕانەگرتووە و بە چەندین جۆر چەكی قورس و فڕۆكە هێرش دەكەنە سەر سەێكانی بە ئامانجی كۆمەڵكوژی گەلەكی”.
بەڕێوەبەرایەتی خۆسەری دیموكراتی ئاشكراشی كردووە، تا ئێستا بۆردومان بەردەوامە و بەهۆیەوە لەو ماوەیەدا 17 هاووڵاتی مەدەنی شەهید بوون و 24 كەسیش بریندار بوون و ژمارەیەكیشیان هەوڵی ڕزگاركردنیان دەدرێت، بەڵام بەهۆی بۆردومانی فڕۆكە و تۆپهاوێژەكانەوە بۆ سەر ماڵی هاووڵاتیان لەم دوو ڕۆژەدا نەتوانراوە گیانی دەیان كەس ڕزگار بكرێت.
جەختیشی كردۆتەوە، كە فڕۆكە جەنگییەكان كاروانی فریاگوزاری و تیمە پزیشكییەكان بۆردومان دەكات و تا ئێستا شارەكە گەمارۆدراوە.
