كۆمیسیۆنی مافی مرۆڤ لە کەرکووک: ڕێژەی خۆكوشتن بەراورد بە ساڵی ڕابردوو زیادی كردووە و بووە بە دیاردە

كۆمیسیۆنی مافی مرۆڤ لە کەرکووک: ڕێژەی خۆكوشتن بەراورد بە ساڵی ڕابردوو زیادی كردووە و بووە بە دیاردە

“ئەمساڵ 98 كەس خۆیان کوشتووە”

بەرپرسی نووسینگەی كەركووكی كۆمسیۆنی مافەكانی مرۆڤی عێراق ڕایدەگەیەنێت، جیا لە بەرزیی حاڵەتەكانی خۆكوشتن لە كەركووك، ڕێژەی توندوتیژیی خێزانییش زیادی كردووە.

سەجاد جومعە، بەرپرسی نووسینگەی كەركووكی كۆمسیۆنی مافەكانی مرۆڤ، سەرەتا لەبارەی هۆكار و ئامارەكانی خۆكوشتن لە كەركووك، گوتی: “ئێمە لە چوارچێوەی چاودێرییەكانمان بۆ دۆخی كۆمەڵایەتیی لە كەركووك، لە ساڵی 2019 تێبینیمان كرد، كە ڕێژەی خۆكوشتن لە شاری كەركووك بەرزە و گەیشتووەتە 106 حاڵەتی خۆكوشتن تەنیا لەو ساڵدا، دواتر ئێمە تۆڕی ڕێگریی لە خۆكوشتنمان لەلایەنە پەیوەندیدارەكان و رێكخراوەكان پێكهێنا و پاشان دەستمان كرد بە كۆڕ و كۆبوونەوە، بەتایبەت لە قوتابخانە و فەرمانگە و شوێنە رۆشنبیرییەكان، بۆ چین و توێژەكانی كۆمەڵگە، خەڵكمان هۆشیار دەكردەوە لە مەترسییەكانی خۆكوشتن”.

“رێژەی خۆكوشتن لەناو ڕەگەزی مێدا بەرزە”

ئەوەشی خستە ڕوو، لەو كارەمان بەردەوام بووین، بۆیە ساڵی 2020 تێبینیمان كرد، كە دەستكەوتی باش لە كارەكانمان بەدی هاتووە، بۆیە ساڵی ڕابردوو 63 حاڵەتی خۆكوشتن لە كەركووك تۆمار كرا، كە رێژەكە بەرچاو دابەزی، بێ گومان لەو رێژەیەش ڕەگەزی مێ زیاتر بوو، بە هەمان شێوە لە ساڵی 2019ش لە حاڵەتەكانی خۆكوشتن دیسان لەناو ڕەگەزی مێدا زیاتر بوو.

لەبارەی خۆكوشتن لە ئەمساڵی 2021، بەرپرسەكەی نووسینگەی كۆمیسیۆنی مافی مرۆڤی كەركووك، ئەوەی خستە ڕوو: “ئەمساڵ رێژەی خۆكوشتن بەراورد بە ساڵی رابردوو زیادی كردووە، لەسەرەتای ئەمساڵەوە تا ئێستا 98 كەس خۆیان لە كەركووك كوشتووە، بەشێوەیەك، 78 كەسیان لە رەگەزی مێن و ئەوانی تر لە رەگەزی نێرن، بۆیە بە هەمان شێوەی ساڵانی ڕابردوو، دیسان لە حاڵەتەكانی خۆكوشتن ڕێژەی ڕەگەزی مێ زۆر بەرزە”.

گوتیشی: “لە چوارچێوەی بەدواداچونەكانمان بۆمان دەركەوت، كە هۆكارەكانی خۆكوشتن زۆرن، بەڵام دەتوانین هەموو ئەو هۆكارانە بۆ چەند هۆكارێكی سەرەكی بگەڕێنینەوە، رەنگە حاڵەتی خۆكوشتن بەهۆی كێشەی دەروونییەوە بێ، یان بەهۆی كێشەی كۆمەڵایەتی و توندوتیژیی خێزانی، چونكە توندوتیژیی خێزانییش تاك بەرەو خۆكوشتن دەبات، هۆكارێکی تر بۆ خۆكوشتن باری داراییە، وەك دەزانرێت ساڵی ڕابردوو بەهۆی كۆرۆناوە قەدەخەی هاتوچۆ بوو و كەسابەت كەم بوو، خێزانە كەمدرامەتەكان كاریگەرییەکی زۆر لەسەر دۆخی داراییان دروست بوو، ئەوەش زۆر زەحمەتە و ئەمساڵیش لەگەڵ بەرزبوونەوەی نرخی دۆلار، دیسان گرانیی دروست بوو، کە كاریگەریی لەسەر خەڵك هەیە، هەڵبەتە كەمدرامەتی مرۆڤ بەرەو توندوتیژی و حاڵەتی خراپی دەروونیی دەبات”.

هاوكات، سەجاد جومعە، ئاماژەی بۆ ئەوەش كرد، جیا لە بەرزیی ڕێژەی خۆكوشتن لە ئەمساڵ لە كەركووك، توندوتیژیی كۆمەڵایەتییش زۆر بووە، دەتوانین بڵێین، مانگانە 40 حاڵەتی توندوتیژیی خێزانیی هەیە، ئەوانەی كە لای لایەنە پەیوەندیدارەكان تۆمار دەكرێت، جیا لەوانەی كە تۆمار ناكرێن.

“هەندێ جار دۆسیەی تاوانی كوشتن دەگۆڕن بۆ خۆكوشتن”

بەرپرسەكەی نووسینگەی كۆمیسیۆنی مافی مرۆڤی كەركووك، ئەوەشی خستە ڕوو: “لە بابەتی خۆكوشتندا، هەندێ جار بە نموونە، حاڵەتێكی كوشتن، واتا تاوانێكی جینائی ڕوو دەدات، ئیتر ئەو حاڵەتە دەخەنە چوارچێوەی حاڵەتی خۆكوشتن، بۆ ئەوەی كەسوكاری قوربانییەكە ڕووبەڕووی یاسا و دادگا نەبنەوە، بۆیە لە ڕێگەی ئێوەوە، داوا لە هەموو لایەنە پەیوەندیدارەكان دەكەین، هاوكار بن و هەوڵی زیاتر بخەنە گەڕ، بۆ كۆتاییهێنان بە دیاردەی خۆكوشتن لە پارێزگای كەركووك”.