پۆلیسی كەركوك ئاشكرایكرد، بكوژی ئەو مامۆستایەی ئێوارەی دوێنێ پێنجشەممە لەبەردەم ماڵەكەیدا لە گەڕەكی یەكی نیسانی شاری كەركوك بە دەستڕێژی گولە كوژرا، دەستگیركراوەو دەركەوتوە برایەتی و دانی بەوەدا ناوە كە بەهۆی بونی “كێشەی خێزانییەوە” كوشتویەتی.
بەڕێوەبەرایەتی پۆلیسی پارێزگای كەركوك، ئەمڕۆ هەینی، لە راگەیەندراوێكدا وتی، لەدوای بڵاوبونەوەی هەواڵی كوژرانی مامۆستایەكی زانكۆ لە گەڕەكی یەكی نیسان لەكاتی گەڕانەوەیدا بۆ ماڵەوە، مەفرەزەكانی بەشی لێكۆڵینەوەی نەهێشتنی تاوان دەستیان كرد بە لێكۆڵینەوە لە روداوەكەو سەیركردنی كامێراكانی چاودێری و وەرگرتنی وتەی شایەتحاڵەكانی لە شوێنی روداوەكە.
وتوشیەتی”لەدوای سێ سەعات توانرا بكوژی روداوەكە دەستگیربكرێت و دەركەوت برای كوژراوەكەیەو دانی بەوەشدا نا كە بەهۆی بونی كێشەی خێزانییەوە بەو تاوانە هەڵساوە.”
ئەوەشی خستۆتەڕو”روداوەكە تاوانكارییەو روداوێكی تیرۆریستی نەبوە وەك ئەوەی هەندێك لە میدیاكان بڵاویان كردۆتەوە.”
ئاماژەی بەوەشداوە كە لەئێستادا تۆمەتبارەكە راگیراوە.