گوتەبێژی رێکخراوی مافی مرۆڤی عەفرین دەڵێت، گرووپێکی چەکداری بە ناوی “جەبهە شامییە” گەنجێکیان بە ناوی وەلید محەممەد نەعسان لە گوندی عومەر ئۆشاخێی سەر بە شارەدێی رەجۆ رفاندووە و لە بەرامبەر ئازادکردنی داوای پارە دەکەن.
ئیبراهیم شێخۆ، گوتەبێژی رێکخراوی مافی مرۆڤی عەفرین راگەیاند، کوڕە کوردە رفێنراوەکە لە بنەڕەتدا خەڵکی گوندی ئیحریسی ناوچەی شەهبایە. لە کاتی گەڕانەوەی بۆ عەفرین، لە لایەن چەکدارەکانەوە رفێندراوە و ئێستا لە شاری ئەعزاز بەندکراوە.
گوتەبێژی رێکخراوی مافی مرۆڤی عەفرین ئاماژەی بەوەشدا، چەکدارەکان داوای 20 ملیۆن لیرەی سووری لە خێزانی وەلید دەکەن لە بەرامبەر ئازادکردنی کوڕەکەیان، کە دەکاتە نزیکەی پێنج هەزار و 700 دۆلاری ئەمریکی.
هەروەها هاونیشتمانییەکی دیکە بە ناوی عەلی محەممەد نووری، تەمەن 29 ساڵ و خەڵکی گوندی قورنێی سەر بە شارەدێی بولبول ماوەی هەفتەیەکە دەستگیرکراوە، ئەو کوڕەش خەڵکی شاری تل رەفعەت بووە و دوای گەڕانەوەی بۆ عەفرین لە لایەن چەکدارانی سەر بە تورکیاوە دەستگیرکراوە.
بە گوێرەی گوتەبێژی رێکخراوی مافی مرۆڤی عەفرین، لە ماوەی ئەم چەند رۆژەدا، زیاتر لە 30 کەس لەلایەن گرووپە چەکدارەکانی نزیکی تورکیا، دەستگیرکراون.
