نوسینگەی مافی مرۆڤ لە سلێمانی ئاشكرای كرد، بەدواداچونیان كردووە بۆ دەستگیركراوانی خۆپیشاندانەكان كە بەشێكیان ئازاد كراون و هێشتا بەشێكی دیكەیان ئازاد نەكراون و لێكۆڵینەوە لەگەڵیاندا بەردەوامە.
نوسینگەی مافی مرۆڤ لە سلێمانی لە بەیاننامەیەكدا ئاشكرای كردووە، تیمێكی نوسینگەكە سەردانی بەرێوەبەرایەتی ئاسایشی سلێمانیان كرد و لەگەڵ بەرپرسانی ئەو دامەزراوەیە كۆبونەوە و لە بارودۆخی راگیراوان و دۆسییەكانی خۆپیشاندەرە دەستگیر كراوەكانیان كۆڵییەوە.
رونیشكراوەتەوە، لەدرێژەی سەردان و بەدواداچوونەكان بەشێك لە دەستگیركراوانی خۆپیشاندانەكان دەستەبەجێ پاش لێكۆڵێنەوەكان ئازاد كراون تەنیا ژمارەیەك لەخۆپیشاندەران ماونەتەوە و لەئێستادا سەرقاڵی لێكۆڵینەوەن دواتر بە بڕیاری دادوەر رێكارەكانیان تەواو دەكرێت.
لەماوەی رابردودا خوێندكارانی زانكۆی سلێمانی و پۆلەتەكنیكی و زانكۆی هەڵەبجە و چەندین زانكۆ و پەیمانگای تری شارو شارۆچكەكان خۆپیشاندانیان دەست پێكرد بۆ داوا كردنی دەرماڵە، بەڵام خۆپیشاندانەكان توندوتیژیان تێكەوت و ژمارەیەك خوێندكار و ئەندامی هێزە ئەمنییەكان بریندار بوون و دەیان خوێندكاریش دەستگیر كران.